Surselva - Bun quint 2014 grazia a dapli entradas da taglia
Il cussegl da vischnanca da Mustér ha approvà venderdi saira il quint annual dal 2014. Tar expensas ed entradas da var 14 milliuns, serrà quel cun in gudogn da passa 311’000 francs.
Il cash-flow munta a bunamain 2,2 milliuns francs. Sco raschun per questas cifras positivas numna la vischnanca tranter auter dapli entradas da taglia e la vendita d'energia da concessiun e da participaziun.
Il cussegl da vischnanca ha plinavant concedì in credit supplementar da 113’000 francs per l'avertura da la zona da mastergn a Pignola.
