L’atmosfera è stada ruassaivla, i ha sulet dà intginas dumondas sco per exempel: dastgan quels giuvenils avair ina relaziun, cuschinan els sezs, lavan els sezs lur vestgadira, datti era ina instrucziun da religiun ubain co ves'i or cun il consum da drogas?
A questa dumonda ha Salomé Mathys da l’uffizi da migraziun dal Grischun respundi ch’els n'hajan enfin uss nagins problems da drogas cun requirents d’asil giuvens.
Andrea Ferroni (manader da l’uffizi social dal Grischun), Gabriela Tomaschett (presidenta da l’Uniun Casa Depuoz) e Matthias Gutmann (manader da la Casa Depuoz) han infurmà en detagl davart il project. A la fin ha surtut Salomé Mathys respundi las dumondas generalas.
Tenor Andrea Ferroni èn 86 requirents d’asil minorens arrivads il 2015 en il Grischun (2014 : 28). Ils blers vegnan da l‘Eritrea e da l’Afghanistan. Questa situaziun sforzia da chattar schliaziuns.
Accumpagnads 24 uras e 365 dis
Ils giuvenils en l’Albertushof han ina structura cumpletta, vul dir els vegnan tgirads ed accumpagnads durant 24 uras e 365 dis. A scola (surtut era per emprender tudestg) van els a Cazas. La finamira saja ch’els possian emprender ina professiun e star in di sin agens pes, ha Matthias Gutmann ditg. Ils giuvens (la gronda part saja probabel tranter 16 – 18 onns) tschiffan era ina persuna da confidenza envers anora.
Quest nov center d’asil n'haja betg chaschunà bleras discussiuns. Il president da Glion Aurelio Casanova ha ditg ch’el n'haja survegnì ni dumondas ni mails. Ins quintia che quests giuvens s’integreschian tar nus, sch'ins dettia la schanza ad els da s’integrar.