L’onn 2012 ha Vuorz fiers la fusiun cun 110 encunter 101 vusch, in stretg resultad. Era quella giada pudessi dar in stretg resultat. Ils puncts ch’èn sa midads dapi la davos giada èn, che Vuorz vegn a survegnir ina scoletta.
Quai po esser in factur che pudess quietar in u l'auter, sch'el na sto betg laschar ir ils scolarets ord vischnanca.
In segund punct che croda en egl: i dat ina nova vopna per la vischnanca fusiunada. La davosa giada avevan ins vulì surprender la vopna da Breil per la vischnanca fusiunada, quai aveva procurà per blera critica. Il punct da critica era che la vischnanca fusiunada avess duì avair la Nossadunna en la vopna, quai che na plascheva betg a Vuorz ch’è refurmà. La nova vopna resguarda Breil cun ils Cavistrai, Vuorz cun il chasti ed Andiast cun il sulegl.
La via dispitaivla da Miglié
Era sch’i dat ina nova varianta per la via tranter Breil e Vuorz resta la via in punct dispitaivel. Ils adversaris da la fusiun teman il surpli da traffic. Ed els na vulan betg unfrir ton terren agricul per far quella via. Plinavant saja quai in territori da recreaziun en la vischinanza che vegnissi tangà cun traffic. Las empermischuns ch’i vegnia a dar in scumond per il traffic grev na cuntentan betg ils adversaris.
Breil decida per l’emprima giada
Ina chaussa ch’è propi nova è ch’ils da Breil vegnan quella giada era a votar sur da la fusiun. Tar la davosa fusiun avess Breil gì da votar pir pliras emnas suenter Vuorz ed Andiast, suenter il na da Vuorz n’ha Breil insumma betg votà. Era quella giada san ils da Breil mirar sin ils resultats da Vuorz ed Andiast e decider pir suenter sch’i vulan.
Il chantun sustegn quella fusiun cun dar 6 milliuns francs, il pè da taglia per la nova vischnanca è quel da Breil, numnadamain 100% da la taglia simpla chantunala. Vuorz ha ussa 130 ed Andiast 125 %.
