L’armada svizra ha decidì da bandunar Breil. Quai ha era la regenza grischuna confermà dacurt en il Cussegl Grond.
Mo pli center da scolaziun
Lucas Caduff di che l’armada avevi gia fatg plans da bandunar Breil pli baud. Mo il contract saja vegnì prolungà fin 2025. Dapi 2000 vegn il stabiliment duvrà mo pli sco center da scolaziun. Il motiv dad ir davent saja ch’els dovrian quel durant intginas emnas ad onn.
I fa nagin senn da mantegnair in stabiliment per occupar nus in pèr emnas.
Fitg datiers al cor
Perquai hajan l’armada, la confederaziun ed armasuisse decidì da vender il stabiliment. Mo Lucas Caduff spera che l’armada possia era nizzegiar quel en l’avegnir, perquai che Breil stettia fitg datiers a ses cor, e quai na betg mo perquai ch’el saja burgais da Schlans. La vischnanca haja adina acceptà els.
Sco Sursilvan fa quai schon era mal che quai haja insaco ina finiziun.
Grev da dir tschintg onns ordavant
Breil haja profità dal militar, di il president da vischnanca Clau Schlosser. Ultra da quai han els il tschains d’affittar il terren, perquai che quel appartegn a la vischnanca. Vul dir: ella ha il dretg da precumpra. Clau Schlosser sa dumonda dentant, sch’ina vischnanca possia manar quest stabiliment ubain surprender e laschar el ad auters investiders. Mo qai saja grev da dir tschintg onns ordavant. Ed alura:
Va il militar vairamain davent 2025 u stat el enavant?