En la segund'emprova da fusiunar las vischnancas da Breil, Vuorz ed Andiast, han las radunanzas communalas da Vuorz ed Andiast approvà cleramain il contract da fusiun per la nova vischnanca Breil/Brigels.
Entant che Andiast aveva gia ditg il 2012 cun 68 cunter 21 vuschs gea, aveva Vuorz lezza giada refusà la fusiun cun 110 cunter 101 vuschs. In resultat piz a cup. Il president communal da Vuorz Guido Dietrich spetgava era questa giada in resultat fitg stretg. Damai che quai n’è betg capità, è in crap dà ad el giu dal cor.
Jeu sun fetg cuntents, cunzun perquei ch'igl ei in resultat aschi clar. Quei hai jeu buca spitgau.
Ina surpraisa è il cler resultat da Vuorz era stà per il president communal d’Andiast, Sievi Sgier.
Ei muossa exact che nus havein fatg in bien project. Nus havein adatau quel dil 2012, aschia ch'ei ha era dau ina clara maioritad giu Vuorz e gliez ei per mei impurtont.
Ils adversaris da la fusiun saja quai dentant era da prender serius, di Sievi Sgier. Uschia tranter auter cun mussar si ch'i na dettia betg dapli traffic tras Vuorz. Quai ch'ils adversaris teman cun la nova via da colliaziun tranter Vuorz e Breil, ch'è francada en il contract da fusiun.
Cuntent è era il president communal da Breil, Clau Schlosser. Ina giada pervia dal fitg cler resultat da la vischnanca da Breil. A Breil hajan ins bain spetgà in “gea”, na dentant betg gist in uschè cler. Ch’igl ha dà da Vuorz in cler resultat legra era Clau Schlosser. Quai dettia la legitimaziun da far la fusiun.
Jeu less cumparegliar quei in tec cun l'aura dad oz. Sin quella calira ha ei dau ina frestgentada ed ins sa puspei entscheiver da niev.
Era per el èsi impurtant da far tut il pussaivel per tegnair en il contract da fusiun.
4 milliuns per la fusiun
Per la nova vischnanca Breil/Brigels, che duai ir en vigur il 2018, ha la regenza concedì ina contribuziun da promoziun da 4 milliuns francs ed ina contribuziun da 2 milliuns francs per la via da colliaziun tranter Breil e Vuorz.
La fusiun sto anc vegnir approvada dal Cussegl grond.
RR novitads 12:00++
