Per las responsablas ed ils responsabels da la gruppa d’interess Brass Band Giuvenila dal Grischun era quai gia ils ultims onns ina sfida da vegnir tar participantas e participants. Surtut perquai che la finamira è da furmar duas furmaziuns, ina A-Band ed ina B-Band.
Quest onn è il scenari uss vegnì reals ed ins ha sulet ina furmaziun. Quai saja propi betg ideal, pertge uschia na possian ins betg promover optimal tut. Cun ina furmaziun ferma, l’A-Band, saja pussaivel da promover ils talents a moda ideala, ed il medem mument dettia quai anim a tuttas e tuts che sunan en la furmaziun B, da vulair far sin il proxim onn il pass en la furmaziun A, accentuescha il president da la gruppa d’interess Toni Deplazes. Perquai fiss in dumber da 60 participantas e participants quasi il minimum, quest onn hajan els sulet 37.
Anc avant dus onns eran els radund 60, ma tut stuschar sin la pandemia na saja era betg il vair. Ma sche las musicas dal vitg n’hajan betg pli commembras e commembers giuvens, alura manchian quels era al camp. Pertge els sajan sulet ina plattafurma, la lavur da basa stoppia dentant vegnir da las musicas, di Toni Deplazes.
Collavuraziun cun las scolas da musica
Atgnamain saja il pensum da las scolas da musica da porscher ina purschida attractiva, ed era da vegnir e dumandar: «Co pudain nus promover la collavuraziun?»
Mo per gidar il camp sco era las scolas, saja era d'intensivar la collavuraziun cun las scolas entras il camp sez. In camp, manà cun persunas d’instrucziun professiunalas, è ina tala purschida attractiva, accentuescha Toni Deplazes, che fa part als camps da musica a Sursaissa dapi quasi 30 onns.
Impurtant saja era da motivar las giuvnas ed ils giuvens da sa participar. E forsa schizunt ina giada annunziar els da la scola anora, e far ir al camp per guardar schi plascha u betg.
Promover il camp giaja il meglier cun reclama da bucca a bucca. Quella saja la pli effizienta, di Toni Deplazes.
Or da l'archiv:
