Siglir tar il cuntegn
cuntegn

Surselva Blers giasts dentant nagin record

Entant ch'intgins territoris da skis han strusch pudì avrir lur pistas, runals e sutgeras, ha Mustér che posseda nagins indrizs da far naiv pudì avrir gia ils 20 da december l’entir territori cun bunas relaziuns da naiv.

La pendiculara che maina da Mustér en il terrotori da skis.
Legenda: La pendiculara che maina da Mustér en il terrotori da skis. mad

Il directur da las Pendicularas Mustér, Rudolf Büchi, e cuntent cun il dumber da giasts durant ils dis da festa. Cunzunt suenter Silvester hajan ins gì fitg buns dis. Ed era sch’ils parcadis eran pli che plain sco prest mai, n’haja quai betg dà in record da giasts en il territori da skis da Mustér.

Naiv en la bassa ha mancà

Profità dals territoris da skis en la vischinanza ha Mustér dentant betg, ha ditg Büchi ad RTR. Profità avessan ins mo sch’i avess gì naiv era en la Bassa e la glieud avess survegnì gust dad ir cun skis.

Indrizs da far naiv èn en planisaziun

Malgrà che l’enviern ha mussà che Mustér po avair bunas relaziuns da naiv era senza pudair far naiv artifiziala na duai quai betg restar uschia. Sco Rudolf Büchi di sajan ins intensiv londervi da planisar indrizs da far naiv. Primavaira duai il project vegnir preschentà. L’atun duai la decisiun davart ina midada en la planisaziun locala crudar. Quai vul dir ch’il territori da skis da Mustér n’ha era proxim enviern nagina pussaivladad da far naiv.