Siglir tar il cuntegn

Surselva Blera lavur per ils mecanists da maschinas agriculas

La stad è la stagiun auta per mecanists da maschinas agriculas. Cler, ils purs dovran lur maschinas intensivamain e lura va er adina puspè insatge en paglia. Quai munta er blera lavur per Serafin Caminada a Trun. RTR ha accumpognà el.

Il di da lavur cumenza en garascha a Trun directamain sper la via principala. Lura maina il viadi en Lumnezia a Cumbel tar in pur. Là ha quai num per Serafin Caminada da pinar in tractor. L'alternatur è rut è sto vegnir midà or. Uschè simpel co i guarda or n'è quai betg. E sa chapescha vul il pur empruvar il tractor avant che Serafin Caminada banduna puspè el. Ma tut è grategià ed il viadi po cuntinuar direcziun Vattiz. Là spetga in pur che ha problems cun sia maschina da segar. I ha num chargiar ella sin il char annex e transportar ella en garascha per guardar tge ch'il problem è.

A Sursaissa en la garasch da las pendicularas vegnan er maschinas da pista pinadas u durant la stad revididas.
Legenda: Maschina da pista en garascha. RTR, Prisca Bundi

Suenter gentar...

...èsi ì vinavant cun la lavur en garascha. Silsuenter èsi dad ir a Kartitscha en il territori da skis da Sursaissa. Là lavura in dals lavurers da Serafin Caminada vid las maschinas da pista. E quai er amez la stad. Lura èsi numnadamain temp da far revisiun.

Per maschina quintan ins cun circa duas emnas lavur. Tar 13 maschinas dovra quai pia bler temp, uschia ch'il lavurer a Kartitscha è occupà durant l'entir onn cun las maschinas da pista. Il di da Serafin Caminada finescha là nua ch'el ha cumenzà: en garascha!

Serafin Caminada vid far reparaturas.
Legenda: Serafin Caminada fa reparaturas. RTR, Gion Gieri Flepp

Dapi dus onns independent

Avant dus onns è il mecanist per maschinas agriculas Serafin Caminada daventà independent cun sia atgna fatschenta Surselva Landtechnik GmbH a Trun. El e ses lavurers reparan uss tractors, transporters ni er maschinas da segar. Per quai èsi savens er dad ir en il lieu directamain tar il pur.