Siglir tar il cuntegn
Inhalt

Surselva Bilantscha trais onns «JugendMobil»

Avant trais onns ha il chantun lantschà il project «JugendMobil» – in car annex drizzà en sco café, che vegn bajegià si per in mais en ina vischnanca. El duess esser lieu da sentupada per giuven e vegl ed uschia promover la lavur da giuventetgna en las vischnancas dal Grischun.

JugendMobil a Sursaissa dasper il Rufalipark.
Legenda: Enfin la fin matg è il JugendMobil a Sursaissa dasper il Rufalipark. mad

Cun l'agid da persunas scoladas duai la giuventetgna elavurar en il «JugendMobil» atgnas ideas sco per exempel in local da giuventetgna e lura era realisar quellas ideas, ensemen cun creschids e la politica communala. Actualmain è il mobil per giuventetgna a Sursaissa sper il Rufalipark. Quai è la 20avla da 24 vischnancas ch'el visita. La finamira principala n'è dentant anc betg cuntanschida.

8 plazzas d'assistent/a da giuvenils

La finamira dal project è clera. En in terz da las vischnancas visitadas duai vegnir creà enfin l'onn 2020 ina plazza per in'assistenta ni in assistent da giuvenils. Da las 19 vischnancas ch'il mobil ha visità enfin uss, han dentant be quatter creà ina tala plazza. En 10 vegn anc discutà pli u main intensiv sur d'ina tala plazza e tschintg vischnancas han decidì da far nagut.

Per il mainaproject Stefan Parpan è quai dentant nagin problem. Per l'ina saja savens gia impurtant d'insumma discutar davart il tema promoziun da la giuventetgna en vischnanca, e per l'autra quintia el, ch'enfin il 2020 vegnian anc creadas ulteriuras plazzas d'assistents da giuvenils.

Stefan Parpan quinta da pudair realisar en tut radund 10 novas plazzas. E quai fiss dapli che la finamira dal project.

RR actualitad 12:00