Siglir tar il cuntegn

Surselva Bau-scorsa na duess betg esser in problem

In enviern miaivel cun pauca naiv e temperaturas autas na vul anc betg dir, ch’i dettia in problem cun il bau-scorsa.

La preda ord ina trapla, 4'000 fin 5'000 baus-scorsa.
Legenda: La preda ord ina trapla, 4'000 fin 5'000 baus-scorsa. RTR, C. Albin

Cun temperaturas plitost autas e pauca naiv è l’enviern passà stà miaivla. Quai ch'è stà in enviern catastrofal per las pendicularas e per il turissem d'enviern, è stà in enviern fitg empernaivel per blers insects.

Era per insects nuschaivels sco per exempel il bau-scorsa. La tema è uss ch’il bau-scorsa vegnia a sa multiplitgar considerablamain e chaschunar problems en noss guauds durant la stad 2016.

Primavaira pli decisiva

Tenor il selvicultur Maurus Cavigelli dal revier forestal Sagogn-Laax na munta in enviern miaivel betg ch'il bau-scorsa daventia in problem durant la stad.

Pli impurtant saja l’aura durant la primavaira. Sche quella saja sitga e chauda, lura possia il bau-scorsa sa sviluppar pli svelt. Quai signifitgass ch'il bau sgulass pli baud e vegniss perquai da sa multiplitgar trais giadas durant la stad e betg mo duas giadas sco normal.

Maurus Cavigelli davant ina da las traplas da bau-scorsa.
Legenda: Maurus Cavigelli davant ina da las traplas da bau-scorsa. RTR, C. Albin

Cunquai ch'ina femella dal bau-scorsa metta 100 enfin 150 ovs per giada, ha ina perioda da vegetaziun dapli che normal ina gronda influenza sin la populaziun da baus. Ch’i haja adina puspè dà dis bletschs e fraids l’avrigl possia dentant franar il svilup dal bau-scorsa. Perquai quinta Maurus Cavigelli era betg cun in grond problem.

Legenda:
Media da baus scorsa pigliads per trapla Uffizi da guaud e privels da la natira dal Grischun