Siglir tar il cuntegn

Header

Video
La baselgia da la claustra da Mustér splendura en nova glischur
Or da Telesguard dals 05.11.2019.
laschar ir
cuntegn

Baselgia claustra da Mustér Suenter quatter onns resplenda la baselgia en nova glischur

La baselgia da la claustra da Mustér resplenda suenter quatter onns lavurs da renovaziun en nova glisch. Il di da Son Martin, ils 11 da november, vegn la baselgia inaugurada cun ina messa festiva. La gronda sfida saja stada da rimnar ils daners necessaris, di avat Vigeli Monn. Ma cun agid da la Confederaziun, da la tgira da monuments dal chantun e da differents donaturs sajan ils 16,1 milliuns francs la finala vegnids ensemen.

Lavurs da la fatschada

Las lavurs vi da la fatschada da la baselgia han cumenzà il 2016. Cunquai che quella fascheva ina mala cumparsa, han quellas lavurs stuì vegnir fatgas relativamain svelt. Sco punct culminant da questa renovaziun numna l’architect Matthias Schmid il fresco sisum che mussa l’avat Vigeli cun ina part da ses conventuals.

Maletgs resplendan en nova glisch

En l’intern da la baselgia è tut quasi sco nov. Uschia èn tut ils maletgs ed ils altars vegnids pulids. Medemamain èn ils bancs da seser vegnids renovads dal tuttafatg.

Statica era in problem

La statica da l’entir bajetg intern ha stuì vegnir quintada da nov. Uschia saja vegnì a la glisch ch'i deva plirs stgarps ed uschia han ils responsabels decis da montar stangas da metal che segireschan la statica da la baselgia.

Nov altar or da marmel alv

En egl dat surtut il nov altar entamez il cor da la baselgia. Era sche quel è davos il grond giatter da fier resplenda el entamez la baselgia. Creà è quel vegnì da l’artist Kurt Sigrist da Sarnen. El ha lura era proponì da far l'altar or da marmel alv da Laas en il Vnuost. L’altar correspundia a las pretensiuns da la baselgia, di l’avat. Il di da Son Martin vegnian las reliquias messas en l’altar, quai sco la tradiziun veglia da l’architect e da l’artist. Alura vegnia l'altar benedì, di avat Vigeli.

Gronda satisfacziun

Per l’avat da Mustér èsi ina gronda satisfacziun che las lavurs èn uss a fin e che tut saja ì uschè bain. Era il concept da glisch dettia a l’entira baselgia ina tempra tut speziala e l’entir convent claustral saja uss cuntent da puspè pudair celebrar las messas e las uraziuns en la baselgia gronda.

RR actualitad 17:00