Siglir tar il cuntegn

Header

cuntegn

Bain puril da la claustra Las soras da Glion vendan l'Albertushof

Il bain puril Albertushof sur Glion, ch'è en possess da la claustra da Glion, duai vegnir vendì. I sa tracta d'in cumplex vast cun chasas, clavads, stallas e remisas. La vendita da l'immobiglia duai surprender in biro indigen.

Il cussegl general haja fixà en sia strategia a lunga vista da vender tuttas immobiglias che na servan betg direct sco lieu d'abitar per las soras, sco ch'igl è da leger en la communicaziun da la clausta. Sin la surfatscha da passa 14'000 meters quadrat, che las soras han manà sezzas fin il 2003, stat ina chasa d'ina famiglia ed en vischinanza ina chasa da trais famiglias, dentant er in giagliner, in clavà cun scrinaria, ina stalla gronda e pliras remisas. La vendita duai capitar en in toc.

Il bajetg principal da l'Albertushof.
Legenda: Il bajetg principal da l'Albertushof. MAD

Segirar la pensiun a las soras

La finamira da la fundaziun sco proprietaria è da segirar a lunga vista l’existenza da la claustra. Sco che la priura e presidenta dal cussegl da la fundaziun Sora Annemarie Müller di, saja la fundaziun sa decidida da sa separar dad objects che n'hajan betg da far direct cun il scopo da la fundaziun claustrala. Uschia possian ins finanziar la vita monastica e l’activitad apostolica da las soras dominicanas da Glion. Plinavant duai ella garantir la pensiun e la tgira da las soras fin la mort, uschia la priura.

Artitgels legids il pli savens