Badigliada per la nova sutgera sin il pass da l’Alpsu

La sutgera remplazza il runal, è 966 meters lunga, po transportar 2'400 persunas per ura e custa 9,5 milliuns francs.

Laschar ir video «Emprima badigliada per la nova sutgera sin il pass da l’Alpsu»

Emprima badigliada per la nova sutgera sin il pass da l’Alpsu

2:56 min, Telesguard dals 17.9.2015

Perquai che las organisaziuns da l’ambient n’han betg fatg recurs, po l'Andermatt-Sedrun Sport SA (ASS) cumenzar a bajegiar la sutgera da sis. Mo tuttina èsi memia tard per terminar ella enfin la proxima stagiun da skis. Il motiv è ch’els han stuì spetgar ditg sin las lubientschas, di il directur da la ASS Silvio Schmid.

En funcziun l'enviern 2016/17

Il president dal cussegl d’administraziun da l’Andermatt Sedrun Sport SA e da l’Andermatt Swiss Alps SA, Samih Sawiris, sa ch’i na giaja betg adina spert en la vita commerziala. Ins na possia betg avair tut, uschiglio fiss la vita memia simpla. En funcziun va la sutgera nova sin il pass Alpsu l’enviern 2016/17.

Tujetsch e Mustér stoppian collavurar

In auter tema ha anc dà da discutar: Sedrun Mustér Turissem. Il cusseglier guvernativ dal Grischun Jon Domenic Parolini ed era Samih Sawiris han punctuà, ch’i saja necessari che las vischnancas da Tujetsch e Mustér collavurian en il turissem. La regenza grischuna pretendia quai, uschia Parolini.