Siglir tar il cuntegn

Surselva Bacalhau e fado a Mustér

A Mustér vivan 217 persunas dal Portugal. Perquai vul il Forum cultural internaziunal Mustér organisar in inscunter: l’encontro portugal grischun. Quel è sonda, ils 19 da settember.

Sujet dal placat: il gallo sco simbol per il Portugal ed il capricorn, sco simbol per il Grischun
Legenda: Sujet dal placat: il gallo sco simbol per il Portugal ed il capricorn, sco simbol per il Grischun mad

L’entschatta fan gruppas d’uffants e creschids cun gieus da ballape. Suenter datti la chaschun d’emprender d’enconuscher spezialitads portugaisas (p.ex. il pesch Bacalhau) e grischunas. La saira stattan chant, musica, saut ed infurmaziuns sur da la cultura e tradiziun portugaisa sin il program. L'inscunter ha lieu en il center da sport e cultura da Mustér. Artists che sa preschentan èn Silvia Mitev che chanta il «fado», plinavant ina gruppa da Hinwil, l’uniun da costums Mustér ed il chantautur Mattiu Defuns.

Emprender d'enconuscher in l'auter

La finamira saja d’emprender d’enconuscher in l’auter, la cultura e la tradiziun dals Portugais, di Jacinta Jacomet, la presidenta dal Forum cultural internaziunal Mustér. Cun preparar l’inscunter haja ella survegnì ina relaziun persunala cun ils Portugais. En il comité d’organisaziun èn quatter Portugais. In è Pedro Botelho che viva dapi 9 onns a Mustér. El crai ch’i saja bun era per las persunas dil Portugal da far ina festa ensemen per ch’els sa sentian bain e ch’els sajan integrads en vischnanca.