Siglir tar il cuntegn

Header

La chasa dal club da golf Bunavista a Sagogn. Davantvi il lai artifizial.
Legenda: La chasa dal club da golf Bunavista a Sagogn. Davantvi il lai artifizial. RTR, C. Albin
cuntegn

Surselva Aura setga nagin problem per la plazza da golf a Sagogn

La stad 2015 cun ina lunga perioda da temperaturas chaudas n’è betg in problem per la plazza da golf a Sagogn. Avunda aua è disponibla ed il terren è adattà per resister a periodas da setgira.

Per ina plazza da golf, nua ch'ils giugaders spetgan da savair dar sin in bel pastg verd, n’è aura chauda e sitga betg ideal.

audio
Aura setga nagin problem per golf Sagogn
ord RTR Audio dals 10.08.2015.
laschar ir. Durada: 4 minutas 9 Secundas.

Per la plazza da golf Bunavista a Sagogn n’è quai dentant betg in problem. Tenor Kurt Deflorin (53), il schef dals greenkeepers, ils ortulans responsabels per la plazza da golf, han els avunda aua a disposiziun. Cun in sistem da schuar sa el bagnar mintga singula da las 18 pistas, tut tenor basegns.

Lai artifizial

L’aua per schuar survegn la plazza da golf da la vischnanca, il surscul dal reservuar. L’aua che culava avant directamain en il Rain, vegn uss rimnada en in lai artifizial da 6’000 m3 amez la plazza da golf. Cun 4 pumpas vegn quell’aua repartida sin l’entira plazza da golf, che ha ina surfatscha totala da 72 hectaras.

Terren adattà

Sco Kurt Deflorin raquinta, è era il terren a Sagogn era adattà per resister setgiras. Il terren saja plitost grass, vul dir cun bler arschiglia, e possia uschia absorbar meglier l’aua. Quai gidia il pastg durant temps da setgiras ed els na stoppian betg schuar uschè bler sco tar in terren magher cun bler sablun.

Artitgels legids il pli savens