Artistas da make-up èn las bunas olmas

A Mustér vegn era quest onn fatg teater. Sper ils acturs dovri dentant anc blers gidanters sco las artistas da make-up.

Laschar ir video «Schatg or dal toc «Il pli tup mument»»

Schatg or dal toc «Il pli tup mument»

9:55 min, Actualitad video dals 6.1.2016

Tar il far teater èsi savens uschia che las vegliadetgnas da las rollas na correspundan betg cun las vegliadetgnas dals acturs ch’èn a disposiziun en ina gruppa. Cunzunt en tals muments èn las artistas da make-up dumandadas. Tar la Gruppa da teater Mustér èn quai Antonella Wenzin e Prisca Solèr.

Legenda da maletgsLas artistas da make-up han da far ord Corsin Maissen in um da 66 onns.

Ellas fan quai gia dapi plirs onns. Era ellas han da far emprovas per chattar ora co igl è da smincar il meglier per che l’actura u l’actur correspundia a la rolla. I vala da chattar la dretga mesira per che la sminca fa effect, na dat dentant betg en egl a l'aspectatur. Sper il smincar han Prisca Solèr ed Antonella Wenzin era magari da quietar la gnerva dad in ni l’auter actur durant il smincar.

Il toc

Sco igl è prest usit tar la Gruppa da teater Mustér vegn preschentà ina cumedia. Quella ha il titel «Il pli tup mument» ed è vegnida scritta dad Andreas Kessner. La translaziun rumantscha ha Alexi Monn fatg.

La vaiva Erna Moser viva en in agen mund dapi la mort tragica da ses um ed uschia festivescha ella era il di da naschientscha da 66 onns da ses consort. Quai di cumpara in cussegliader d’assicuranzas che vul pajar ora in’assicuranza da vita per Paul Moser. Pajar il mez milliun paja l’assicuranza dentant mo sche l’assicurà viva anc e Beat Sommer da l’assicuranza ha l’incumbensa da sclerir, sche quai è anc il cas. En quest mument cumenza il drama. Nua tschertgar a la sperta in um che viva anc? Il figl Daniel ha l’idea da dumandar il vischin Willi da giugar la rolla dal bab. Il Willi ch’è uschia ni uschia inamurà en la mamma è la finala d’accord da far quai. Tut para dad ir en bain fin ch’il consort da Erna Moser stat avant isch.

Producziuns

  • Sonda, 9 da schaner 2016, las 20.00
  • Venderdi, 15 da schaner 2016, las 20.00
  • Sonda, 16 da schaner 2016, las 20.00
  • Dumengia, 17 da schaner 2016, las 14.00
  • Venderdi, 22 da schaner 2016, las 20.00
  • Sonda, 23 da schaner 2016, las 20.00

Reservaziuns: 081 947 50 29