Siglir tar il cuntegn

Header

cuntegn

Surselva Arena da skis Andermatt-Sedrun: 3 indrizs novs vegnan en funcziun

Las lavurs per colliar il territori da skis Andermatt-Sedrun cuntinueschan. I vegn lavurà en plirs lieus, tranter auter a la staziun amez a Nätschen e vid duas sutgeras.

audio
Saira: Stan actual colliaziun dals territoris da skis Ursera cun Sedrun
ord Actualitad dals 23.11.2017.
laschar ir. Durada: 2 minutas 27 Secundas.

La telecabina dad 8 da Andermatt – Nätschen – Gütsch stoppia esser en funcziun fin ils 23 da december, cura ch’ils giasts vegnian. Quai di il directur da la Andermatt – Sedrun Sport SA (ASS) Silvio Schmid.

Anc finir l'ustaria ed il plaz per uffants

A la staziun amez al Nätschen dettia quai anc bler da far, per ex. finir l’ustaria ed il plaz per uffants. E fin ils 23 da december stoppian els anc far tests e laschar ir la telecabina 50 uras senza interrupziun e lura stoppia l’Uffizi federal da traffic anc dar la concessiun definitiva. La staziun da muntogna al Gütsch saja preparada.

Lavurs vid duas sutgeras

Plinavant vegni lavurà en la regiun dal Schneehüenerstock. La sutgera dal Stralgand duess esser finida fin Nadal. In pau pli critic èsi cun la sutgera da 6 da Vordere Felli sin il Schneeehüenerstock. Quella na saja probabel betg finida fin Nadal, di Silvio Schmid. Là veglian els lavurar enavant per ch’ins possia alura prender en funcziun questa sutgera la fin da schaner.

Teoreticamain colliads

Suenter fissan ils dus territoris da skis da Andermatt e Sedrun teoreticamain colliads, di Schmid. Ins pudess ir cun skis dal Schneehüenerstock fin il pass da l’Alpsu. Mo ils skiunzs stuessan ir atras la naiv entira, i na fiss betg ina pista preparada.

Sper la telecabina dad 8 e las sutgeras ch'èn quest enviern en funcziun ha la ASS era tratg 15 km lingias per ils indrizs da naiv e preparà las pistas, ed ins vul anc construir a fin la staziun da pumpar sin l’Alpsu.

Investì quest onn 50 – 55 milliuns francs

Quest onn hajan els bajegià per ca. 50 fin 55 milliuns francs, di Schmid. Ed il 2018 quintan els dad investir anc ina giada ca. 20 milliuns francs. En il territori da skis da Andermatt-Sedrun vegnia uschia investì en ina emprima etappa ca. 130 milliuns francs.

Propi colliads èn ils dus territoris, cura che la telecabina da 10 che va da l’Alpsu en direcziun dal Schneehüenerstock saja en funcziun. Quai vegnia alura probabel ad esser la stagiun d’enviern 2018/19.

RR actualitad 17:00

Artitgels legids il pli savens