Siglir tar il cuntegn
cuntegn

Surselva Andiast è vegnì pli pitschen

Entras novas mesiraziuns da las geodatas per satellit è la surfatscha da la vischnanca Andiast sa sminuida per 66 m². Quai èn 0,004% da la surfatscha totala.

La vischnanca dad Andiast - fotografà davent da Sursaissa
Legenda: La vischnanca d'Andiast 'perda' 66 m² da sia surfatscha. RTR

Enfin ussa valivan las mesiraziuns uffizialas da l'onn 1903, communitgescha la chanzlia chantunala. Questas mesiraziuns eran vegnidas fatgas a lezzas uras cun in sistem cumplitgà sin basa da puncts fixs. Per mesirar la surfatscha vegniva duvrà in sistem en furma d'elipsa. Ils onns 90 ha la Svizra lura introducì mesiraziuns entras satelits. Quels lavuran tenor in sistem pli precis ch'ins savess cumparegliar - en sia furma - cun in tartuffel. Dapi l'emprim da december vala uss la nova metoda da mesiraziun.

Grischun è 'creschì' per 10 hectaras

In'evaluaziun da questas mesiraziuns mussa uss che la surfatscha dal Grischun è tut en tut per circa 10 hectaras pli gronda che calculà avant 113 onns. Divers puncts èn vegnids spustads uschia che tschertas vischnancas èn per uschè dad dir 'creschidas' ed autras vegnidas pli pitschnas. A la fin dals quints è la mesiraziun simplamain vegnida pli correcta.

Il Grischun è partgì en 229'000 parcellas

Da questas parcellas èn bun 10% pertutgadas da midadas che muntan a dapli che 1 m². I sa tractia dentant da parcellas grondas che tutgan per il pli a vischnancas ubain a plirs possessurs.

Quantas parcellas en il GR èn creschidas ubain diminuidas

15413 parcellas
creschidas per enfin 1m²
6000 parcellassa diminuidas per enfin 1m²
1700 parcellascreschidas per enfin 2m²
600 parcellassa diminuidas per enfin 2m²
2300 parcellascreschidas per passa 2m²
1000 parcellassa diminuidas per passa 2m²

RR novitads 11:30


2012: La mesiraziun uffiziala ha festivà il giubileum da 100 onns

marca
Legenda: Al giubileum da 100 onns mesiraziun uffiziala vegn ina marca deditgada. Keystone

100 onns mesiraziun uffiziala per mesirar terrens, parcellas, prads e bler dapli. Festivà ha era l'Uffizi da mesiraziun grischun, da lezzas uras cun Aurelio Casanova a la testa. Toni Riedi ha raquintà, coi vegniva mesirà pli baud, per exempel il Terri.

RR actualitad bunura, 12.05.2016