Siglir tar il cuntegn

Header

Il Chedi.
Legenda: Il Chedi. RTR
cuntegn

Surselva Andermatt Swiss Alps - vendì immobiglias per 110 milliuns francs

Malgrà la situaziun economica difficila discurra l’Andermatt Swiss Alps (ASA) dad in onn da fatschenta 2015 allegraivel. La svieuta munta a 145 milliuns francs, il deficit 35,6 milliuns.

audio
Mezdi: In bun onn da fatschenta per Andermatt Swiss Alps
ord Actualitad dals 14.04.2016.
laschar ir. Durada: 1 minuta 30 Secundas.

L’ASA haja pudì vender immobiglias per 110 milliuns francs. Quai scriva l'interpresa dal investur egipzian Samih Sawiris en ina communicaziun a las medias.
Il Chedi, l’hotel da tschintg stailas ad Andermatt, haja pudì augmentar la svieuta per 28,2 %. L’onn passà è el stà occupà per 40,3%, quai è 7,5 % dapli che l’onn avant.

Plazza da golf cun 18 rusnas

Dentant èsi vegnì dà l’emprima badigliada per in segund hotel da quatter stailas, la Gotthard Residences sco era per la tschintgavla chasa d’appartaments. E duas ulteriuras vul l’ASA cumenzar a bajegiar anc quest onn. Il project principal dal 2016 è l'avertura da la plazza da golf cun 18 rusnas.

Sutgera sin il pass da l'Alpsu

Era il project per l’Arena da skis Andermatt-Sedrun progredescha. Quest onn è l’emprima sutgera da sis nova en funcziun al Gemsstock. Ina ulteriura è planisada e duess esser en funcziun cun la proxima stagiun d’enviern, ina sutgera da sis sin il pass da l’Alpsu. E forsa – tut tenor la procedura cun la lubientscha – pon ins cumenzar a bajegiar la telecabina che va da la staziun dad Andermatt sin il Gütsch.

Legenda:
Svieuta Andermatt Swiss Alps (ASA) Rapports annuals da ASA 2014/2015

Investì 548 milliuns

Fin uss hajan ins investì 548 milliuns francs en il resort da vacanzas ad Andermatt. Quel cumpiglia en tut 6 hotels da quatter fin tschintg stailas, ca. 500 appartaments en 42 bajetgs, 25 chalets, in indriz da congress, ina halla da nudar ed ina plazza da golf da 18 rusnas.

Artitgels legids il pli savens