Las duas pendicularas en la regiun dad Andermatt-Sedrun- Mustér han lantschà in'acziun speziala. La finamira è da reducir il pretsch da la carta dal di per ir cun skis – quai cun in abunament da mez pretsch, cun plirs bus che van dad Andermatt a Lucerna, Basilea, Turitg e Winterthur e trens spezials che van la sonda da Turitg ad Andermatt. Quai per ina carta dal di dad ir cun skis (inclusiv traffic public) da 69 enstagl dad 84 francs.
Laschar l'auto a chasa
Ina finamira da quest’acziun è da reducir il traffic individual, sco il responsabel per medias da la Andermatt Swiss Alps, Stefan Kern, di. Els hajan numnadamain paucs parcadis ad Andermatt ed ina schliaziun a curta vista na dettia quai betg per quest problem. Ina idea saja da crear novs parcadis ad Andermatt ubain era a Göschenen, u da bajegiar ina chasa da parcar.
Crescher anc per 30 %
Las Pendicularas Andermatt-Sedrun Sport han gì success l’enviern passà cun ca. 450’000 skier-days. La finamira è dentant da crescher anc per 30% a var 600’000 skier-days. Sco Stefan Kern di, stoppian las pendicularas avair pli blers giasts per pudair amortisar las investiziuns da passa 130 milliuns francs en il territori da skis.
RR actualitad 11:00