Avant var 30 onns ha ina firma canadaisa fatg singuls sondagis en la Val Medel, dapli n'è dentant betg marschà. Actual spetga l’interpresa Swiss Gold sin ina decisiun dal chantun, sche ella possia far sondagis. Savens tuna i sco sch'i vegniss avert ina mina gia il proxim di. Dasperas è ina mina d’aur en Surselva anc lunsch davent.
Pussaivel, ma ....
Tenor il parsura da l'institut da geochemia e petrologia da la scola politecnica federala a Turitg, Christoph Heinrich, dettia avunda aur en la Surselva. Il problem saja dentant che nagin na sappia nua che l'aur è. Enfin uss hajan ins be chattà pitschnas zonas cun ina concentraziun d'aur auta avunda. I duvrass dentant ina avaina da plirs tschient meters cubic per ina explotaziun economica.
Da principi saja ina mina d'aur ord vista tecnica pussaivla. I duvrass dentant investiziuns da plirs tschient milliuns francs per chattar ina avaina d'aur gronda avunda (e quai mo cun ina schanza da 10%) ed era avrir ina mina. Quai saja chapital da ristga, cun ina pitschna schanza da far in grond gudogn ed ina gronda ristga da sperder tut. Actualmain na saja betg pussaivel da chattar avunda chapital da ristga sin la fiera, e perquai è la schanza ch'i dettia ina mina d'aur en Surselva tenor Christoph Heinrich era fitg pitschna.
RR actualitad 12:00
