L'ultim di da lavur ha Roger de Weck vulì passentar a Sagogn tar la producziun dal film «Amur senza fin», perquai che quai saja l'emprim grond film rumantsch che vegnia producì e perquai ch'el saja attaschà a la Rumantschia.
Dapi intgins onns haja el in segund domicil en l'Engiadina Bassa ed el saja stà tschiffà da l'entschatta ennà da la cultura rumantscha. Il rumantsch furmia ina suletta cultura, schebain ch'i dettia differents idioms e las parts rumantschas sajan spartidas en differentas vals.
«Jau ma sent fitg bain en questa cultura. Ella è viva, ella è moderna, ella è averta al mund» declera l'um, che cumplenescha l'october ses 64avel anniversari.
Roger de Weck: «Je ne regrette rien»
Entras sia lavur sco directur general da la SRG SSR haja el emprendì d'enconuscher fitg profund la Svizra. Davent dal sport, sur ils usits, da las muntognas fin tar las metropolas, dals artists fin tar ils circuls economics.
«La SRG SSR è en ina ni l'autra maniera in spievel da tut quai ed uschia na datti quai nagina meglra metoda d'emprender ad enconuscher uschè intensivamain la Svizra» ha ditg Roger de Weck. E perquai manegia el davart ses 7 onns sco directur general da la SRG SSR: «Je ne regrette rien».
Emprender rumantsch
Ils plans concrets da tge ch'el vegn a far en l'avegnir na vul el betg tradir. El vegni a scriver, moderar occurrenzas ed era far referats. Roger de Weck tradescha dentant, ch'el vegnia ad esser savens en l'Engiadina Bassa e ch'el vegni era ad emprender vallader. Ma el manegia che quai dovria pazienza. La finala haja el duvrà 7 onns d'emprender tudestg ed el na saja era betg pli il pli giuven.
Il succesur da Roger de Weck sco directur general da la SRG SSR è Gilles Marchand.
RR actualitad 08:10