Responsabels per l'infrastructura da l'agrischa a Glion è Martin Alig da Sursaissa. Per el ha la festa amez la citad da Glion duas varts. Per ina saja la festa uschia fitg interessanta per ils visitaders. En in lieu central e datiers da la staziun da la viafier. Per el fetschia l’areal da festa amez la citad dentant tut in zic pli cumplitgà. I n’haja betg dà gronds problems da schliar, plitost dapertut ina massa pitschens.
Circa 50 stans e tendas
En tut vegn construì var 50 stans e tendas da partenaris da l'exposiziun, sponsurs ed expositurs. Plinavant vegn bajegià ina tenda da festa, ina tenda ed ina arena per preschentaziuns d'animals. Per ils pitschens è schizunt planisà in zoo cun animals da niz.
Il team d’organisaziun ha planisà tut l’infrastructura per in dumber da 15’000 visitaders. Il traffic supplementar entras ils visitaders da l'agrischa na duess tenor Martin Alig dentant betg chaschunar gronds disturbis.
Sviament da Glion avert
Per ina dettia quai bigliets cun pretschs spezials per motivar tants visitaders sco pussaivel da vegnir cun bus u cun tren a Glion. Per talas persunas che vegnian tuttina cun l’auto, dettia quai dus gronds parcadis. In en la zona d'industria da Schluein ed in a Schnaus. Davent da quels dus parcadis dettia shuttles che transportian ils visitaders en la citad da Glion.
Ultra da quai saja er il nov sviament da Glion gia avert durant la fin d’emna. Uschia giaja tut il traffic en direcziun da Sursaissa e la val Lumnezia enturn l’areal da festa e la via da transit atras Glion che sa chatta gist sper il plaz da festa. Era sch’ils organisaturs da l’agrischa 2016 ston pajar ils custs supplementars ch’il chantun ha per avrir il sviament pli baud che previs, l’avantatg da quella schliaziun valia bler dapli ch’ils custs, manegia Martin Alig.