Siglir tar il cuntegn
Inhalt

Surselva Acziun da rimnar rauba per ils fugitivs

Mintga di vesan ins persunas che fuain ord l'agen pajais per tschertgar asil en l’Europa. Era Daniela Cabernard da Mustér ha vis quai che capita cun famiglias ed uffants che ston laschar enavos tut e bandunar la patria.

L'emprima rauba che Daniela Cabernard ha rimnà.
Legenda: L'emprima rauba che Daniela Cabernard ha rimnà. RTR, H. Giger

Perquai ha ella fatg in’acziun da rimnar rauba sur facebook. Bleras persunas sajan s’annunziadas tar ella. Alura haja ella telefonà als centers d’asil per savair tgi che dovria insatge. Ella rimnia surtut vestgadira e chalzers per ils requirents d’asil en il center da transit Rustico a Laax. Questa rauba veglia ella transportar venderdis a Laax, di Daniela Cabernard.

S'infurmar avant che rimnar

Il manader da l’uffizi da migraziun dal Grischun Georg Carl n’è betg surstà da talas acziuns. Gia en il passà hajan persunas privatas dumandà sch’ellas possian purtar rauba. Impurtant saja però da s’infurmar tge ch’ins pudessi purtar per ils requirents d’asil.

Quai possia esser surtut vestgadira, termagls per uffants u er daners. In zic pli cumplitgà sajan victualias ubain mobiglias. Georg Carl di ch’els fetschian savens l’experientscha che persunas portian da questa rauba ch’els na possian sez betg duvrar pli. Lura capitia savens ch’in center stoppia dismetter la rauba.

Organisaziuns caritativas èn l'alernativa

Enstagl da purtar rauba en in center d’asil dessi era la pussaivladad da dar quai ad ina organisaziun caritativa ubain ad ina stizun da segund maun. Requirents d’asil possian lura acquistar la rauba per in pretsch simbolic e la finala era decider sezs tge ch’els veglian, di Georg Carl.