Sco i vesa ora pudess Glion daventar il lieu, nua che la glieud pli passada passenta la saira sontga avant ch’els van u ston ir en la chasa da vegls. Gest trais residenzas cun la pussaivladad d'abitar cun sustegn datti gia u èn en construcziun a Glion.
Abitar cun sustegn è dumandà
Tar ils servetschs supplementars sa tracti d'agid en il tegnair chasa, sco schubregiar, lavar resti u far cumissiuns. Vidlonder vegnan prestaziuns da la spitex u il servetsch da tschaveras che vegn offrì da las cuschinas da l’ARGO, la chasa da tgira ed attempads u dal Spital Regiunal da la Surselva.
Boom da bajegiar
La dumonda per abitar cun sustegn è avant maun. En il «Curtgin Kaiser», ch’è vegnì construì avant varga 10 onns, èn tut las 28 abitaziuns adina stadas occupadas prest senza interrupziuns. En il «Obschtgarta» ch'avra sias portas il 1. d’avrigl, èn las 18 abitaziuns gia tuttas occupadas. Schizunt tar la «Residenza Sogn Giusep» ch'avra las 78 abitaziuns pir en bun in onn, èn gia in quart da las abitaziuns laschadas a fit.
Sfida per la vischnanca
Per la presidenta communala, Carmelia Maissen, mussa la situaziun actuala il svilup en il sectur d'abitar per persunas che dovran u vulan sustegn. Senza la purschida a Glion prendessan las persunas che tschertgan d'abitar en il center dimora en la bassa, di Carmelia Maissen. In effect a lunga vista che pli bleras persunas attempadas vegnan a Glion ad abitar pudess esser in augment dals custs socials. Da l’autra vart spera la presidenta communala ch’era persunas cun facultad vegnan a Glion, alura cumpensass il surpli da taglias ils custs supplementars.
Differents models da viver
WG's per vegls han ins adina puspè udì. Ma è quai propi in model da viver per glieud pli veglia? Tge auters models datti er anc? I dat e models nua che glieud veglia e giuvna viva ensemen.
