Abitant a Vuorz mo per votar davart fusiun

La vischnanca da Vuorz ha decidì cun mo ina vusch differenza da fusiunar cun Breil e betg cun Glion. Avant la votaziun hajan pliras persunas deponì las scrittiras a Vuorz per ch’ellas possian votar.

La baselgia da Vuorz cun davos in nivel d'urizi.

Legenda da maletgs: Sa prepara in urizi a Vuorz? RTR, L. Livers

Cun 105 cunter 104 vuschs ha la radunanza communala decidì da preparar ina fusiun cun Andiast e Breil e betg cun Andiast e Glion. Anc durant la radunanza communala, ma suenter la votaziun, ha in abitant ch'è pro Breil fatg la reproscha, che anteriurs abitants da Vuorz hajan deponì danovamain las scrittiras a Vuorz sulettamain per pudair votar ed uschia influenzar il resultat. Quai na saja betg gist, che persunas che n'abiteschian betg pli a Vuorz emprovian d’influenzar las decisiuns communalas ed uschia la vita da las persunas che stoppian viver cun las decisiuns. Uschia è in dals convischins da Vuorz s’exprimì a la radunanza communala curt suenter la votaziun.

Naginas natiralisaziuns illegalas

Sin dumonda da RTR ha il president communal da Vuorz Guido Dietrich confermà, che var tschintg persunas sajan s’annunziadas a Vuorz las davosas emnas. Tut quellas annunzias sajan dentant legalas. Las dumondas sajan tuttas vegnidas controlladas e lubidas da la vischnanca.

Suprastanza resta

Il president e la suprastanza da la vischnanca da Vuorz han cleramain favurisà la fusiun cun Glion e han era declerà questa posiziun publicamain. Uss che la decisiun da la radunanza communala è crudada per Breil, sa tschenta la dumonda, sche la suprastanza na duess betg demissiunar.

Guido Dietrich, il president communal da Vuorz.

Legenda da maletgs: Guido Dietrich, il president communal da Vuorz. RTR, L. Livers

Ed: È quai anc la dretga suprastanza per elavurar in contract da fusiun cun Breil? Per il president communal Guido Dietrich n'è quai betg in problem. El sez sco era la suprastanza vegnian ad elavurar in contract da fusiun uschè favuraivel per Vuorz sco pussaivel. Els hajan survegnì l’incarica da la populaziun da Vuorz en quai senn e quai vulan els era far uschia.

RR Actualitad 12:00