Il Masterplan «Rund um den Mundaun» è vegni elavurà da las pendicularas ensemen cun ils presidents communals da las vischnancas da Sursaissa, Lumnezia e Glion. Il plan preveda 10 novs projects per augmentar l’attractivitad da la regiun da stad ed era d’enviern. Tenor in emprima valitaziun muntan ils custs totals per questas novas purschidas a 52,5 milliuns francs che vegnan repartids sin sis enfin set onns.
Ils 10 projects da las pendicularas Sursaissa Mundaun
| project | custs en francs svizzers | stagiun |
|---|---|---|
| renovaziun implants da transport Misanenga - Stein | 18,50 miu. | enviern |
| ennavader Piz Mundaun | 4,00 miu. | enviern |
| illuminaziun pista da trenament permanenta | (anc betg planisà, fiss 1-2 miu.) | enviern |
| avertura territori Alp Nova / Um Su | 17,25 miu. | enviern |
| pista da scursalar (Rodelbahn) | 3,00 miu. | stad |
| tur da raiver | 0,75 miu. | stad |
| pista da tubing | 0,20 miu. | stad |
| senda da viandar dal Piz Mundaun enfin il Piz Sezner | 0,15 miu. | stad |
| purschida da basa per velos da muntogna | 0,20 miu. | stad |
| nov restaurant sin il Piz Mundaun | (anc betg planisà, fiss 1,75 miu.) | entir onn |
Finanziaziun entras vischnancas
Per finanziar questa summa è previs da fundar la «Societad d’infrastructura Mundaun SA». La societad tutgass per gronda part a las vischnancas Sursaissa Mundaun, Lumnezia e Glion e cumprass infrastructura da las pendicularas, p.ex. ils indrizs da far naiv artifiziala.Las pendicularas pajassan a la societad in tschains per nizzegiar l'infrastructura e mantegnessan quella.
La societad da sia vart avess da pajar per la modernisaziun da l’infrastructura existenta e per la realisaziun da nova infrastructura. Uschia duess il territori da skis Sursaissa Mundaun daventar pli cumpetitivs.
RR Actualitad 07:00