Responsabel per la fiera Svizra en la cooperaziun 50 plus Hotels è l’anteriur directur da Surselva Turissem, Roland Huber. Sco el di è il giast sur 50 quel che lascha ils blers daners en ina regiun da vacanzas e saja uschia fitg interessant.
È pront da pajar, sche la purschida constat
Il giast sur 50 mettia dapli pais sin l’ambient dal hotel, sin ina bella chombra, ina buna cuschina, in tschaler da vin cun ina buna elecziun. Els veglian giudair la natira e viandar ni far sport, giudair la cultura u far wellness. Questa gruppa da giasts vegli dentant era s'identifitgar cun l’hotel. Sco Roland Huber di stoppia il hotelier s’empatschar spezial fitg dal giast. Uschia per exempel far ina tura da skis u viandar cun il giast. Il standard ed ils servetschs stoppian giustifitgar il pretsch.
Expansiun duai ir vinavant
En Svizra èn actualmain 5 hotels commembers da la cooperaziun. Da quai quatter en la Surselva: Il hotel Pöstli a Sursaissa, il hotel Surselva a Surcuolm, il Hotel Kistenpass a Breil e la pensiun Alpenblick a Tenna.
Aifer il 2017 vul Roland Huber avair en Svizra 10 fin 20 hotels che fan part a la cooperaziun d‘hotels 50 plus, da quai 8 fin 10 hotels en il Grischun.