La confederaziun dat 40 milliuns francs per in tschains favuraivel. Daners a fonds perdu datti dal chantun Uri (5 milliuns francs) e dal Grischun (3 milliuns francs). Ils 8 milliuns na sto la Andermatt Swiss Alps betg pajar enavos, mo il maun public pretenda garanzias sco per ex. ch’il project vegnia realisà e ch’ins possia avair invista en las cifras da l’interpresa.
Process cumplitgà
I saja stà in process cumplitgà – ha il pledader da l’Andermatt Swiss Alps Markus Berger ditg ad RTR. Retards ha quai dà surtut pervia da las dispitas tar Sedrun Mustér Turissem.
La vischnanca da Tujetsch vuleva sortir da questa organisaziun. Ma alura ha il chantun fatg squitsch cun l’argument ch’i dettia daners dal maun public mo sche las duas vischnancas da Tujetsch e Mustér collavurian en il sectur turistic. La finala ha era Tujetsch suttascrit la cunvegna da prestaziun da Sedrun Mustér Turissem.
Signal positiv per l'Arena da skis Andermatt-Sedrun
Sco Markus Berger di, na sajan ils daners dal maun public betg mo ina part impurtanta da la finanziaziun, i saja er in signal che la confederaziun ed ils dus chantuns crajan en l’avegnir da l’Arena da skis Andermatt-Sedrun.
Las lavurs per colliar il territori da skis Andermatt-Sedrun avanzian tenor plan. Quellas duain esser a fin 2018. En ina emprima etappa vegn investì 130 milliuns francs.
RR actualitad 07:00
