Il di da jodlar grischun ha carmalà ier var 700 giasts a Val. En tut èn 27 furmaziuns grischunas sa preschentadas la dumengia. La presidenta dal comité d’organisaziun, Lucia Zimmermann, ha discurrì dad in fitg bel di. Els n’hajan betg quintà cun uschè in grond public, ha ella ditg envers la «Südostschweiz». En tut èn 25 furmaziuns stadas da la partida a la 46avla ediziun dal di da jodlar grischun. Tranter quellas era chors d’uffants. L’onn passà aveva l’occurrenza stuì vegnir spustada pervi da corona.
Parallel tar las preschentaziuns hai er dà workshops en la chasa da scola. Là han ins pudì empruvar ora da bittar la bandiera u da tibar. Zimmermann è stada fitg cuntenta cun la blera glieud ed er il grond interess da la glieud ch'è vegnida.
Jodladers da Zervreila datti dapi 50 onns
Il chor da jodlar da Zervreila ha 23 commembers e commembras activas. In terz da quellas persunas vegnan d'ordaifer als exercizis. Paul Wyss, il president dal chor da jodladers manegia ch'i haja dà in zic in boom en la scena. Entschet aveva il chor avant 50 onns sco club, cun 15 umens e 4 dunnas. Entant è il chor da Zervreila la suletta furmaziun da chant a Val che contribuescha a la vita culturala dal vitg e che sa raduna durant l'entir onn a provas.