40 onns Casa Depuoz a Trun

1976 ha l'uniun Casa Depuoz realisà l'idea da canoni Christian Berther e bajegià a Trun ina chasa cun scola per uffants cun impediments. Oz è la Casa Depuoz lieu d'abitar e da lavurar, lieu da scola e lieu per far emprendissadi.

L'entrada da la Casa Depuoz.

Legenda da maletgs: L'entrada da la Casa Depuoz. RTR, Linus Livers

La Casa Depuoz festivescha quest onn il giubileum da 40 onns. En il decurs dals onns è il center per scolaziun ed integraziun da persunas cun impediments daventà in'instituziun d'impurtanza chantunala. Betg mo sco lieu d'integraziun, ma era sco grond emploiader per la regiun cun 135 collavuratur(a)s.

Per festivar il giubileum avra la Casa Depuoz sias portas ils 24 da settember, per dar als visitaders la pussaivladad d'emprender d'enconuscher il manaschi.

Co tut ha cumenzà

Nua duai la Casa Depuoz esser e cons scolars duai ella avair? Quai èn stadas duas dumondas che han fatschentà ils iniziants da quest project ils onns da 1950 e 1960. L’idea per bajegiar ina chasa e scola per uffants cun impediments aveva gì il canoni Christian Berther.

Placat da fiasta en la Casa Depuoz.

Legenda da maletgs: Placat da fiasta en la Casa Depuoz. RTR, Linus Livers

In lieu ch’el aveva prendì en mira era stà il chasti da Löwenberg sur Schluein, nua che las soras dominicanas devan scola. Mo l’uvestg ha la finala gì resalvas ed uschia ha Christian Berther tscharnì in’autra varianta cun l'hotel Disentiserhof a Mustér. L’uniun Casa Depuoz ha cumprà quel 1966, mo l’opposiziun (ins aveva tema ch’il turissem pateschia) è stada uschè gronda ch’ella ha puspè vendì l’hotel. A Trun ha l’uniun lura pudì bajegiar in nov edifizi ed avert il 1976 la Casa Depuoz.

Nova purschida «tscherna da mastergn PLUS»

Giuvenils che vegnan en la classa «tscherna da mastergn PLUS» èn existenzas periclitadas. Per els è quella classa l'ultima schanza.

Fotografia da la Casa Depuoz da lunsch davent.

Legenda da maletgs: La Casa Depuoz festivescha quest onn l’anniversari da 40 onns. RTR, Linus Livers

Sco quai che Matthias Gutmann, il manader da l’instituziun ha detg, quintan els cun in success da radund 50%. Success vul dir ch’ils giuvenils chattan la storscha e vegnan la finala da star en la vita sin agens pais. Tar la classa «tscherna da mastergn PLUS» sa tracti d’ina purschida ch’i dat pir dacurt en la Casa Depuoz. Ins na dastga betg scumbigliar questa purschida cun la classa normala da tscherna da mastergn, cun il «PLUS» èn vairamain manegiads ils cas ils pli extrems.

Emprender da vegnir sur sasez

Tar la Casa Depuozs tutga dapi 2013 era la Casa Prisma che sa chatta amez il vitg da Trun. En questa chasa abitan giuvnas e giuvens ch’eran londervi da far l’emprendissadi.

Casa Prima a Trun

Legenda da maletgs: En la Casa Prisma datti differentas gruppas d’abitar da giuvnas e giuvens che fan in emprendissadi. RTR, G. Hosang

Mo dasper l’emprendissadi han els era d’emprender da vegnir sur sasez. Perquai han els era da far il perchasa. Mintgina e mintgin ha da surpigliar pensums. In da quels è per exempel era far tschaina. Las giuvnas ed ils giuvens pon decider tge di ch’els vulan far quai e tge ch’els vulan cuschinar. Nus avain accumpagnà Ian.


Ord l'archiv

RR actualitad 06:00+

La Casa Depuoz

  • 135 collavuratur(a)s
  • 89 plazzas a temp cumplain
  • 55 scolaras e scolars (25 intern / 30 extern)
  • 20 emprendists
  • 35 cussadents creschids