25 onns ensolvers da purs il 1. d'avust

200 avevan reservà, 300 èn vegnids.

L'ensolver d’emprim d'avust datti dapi l'onn 1992. Quai è da sias uras stà ina campagna da l'uniun da purs per la festa da 700 onns Confederaziun. Ussa èni plitost stgars ils brunchs d’emprim d’avust. Quels da la Surselva èn spert dumbrads: Medel, Valendau, Fidaz, Stussavgia e Rueun. A Rueun porscha la famiglia Alpiger il brunch d’emprim d’avust.

Ch’els fan quest onn in brunch è d’engraziar a Roman e Corin Alpiger, ils dus uffants da Markus ed Anita Alpiger. Roman e Corin hajan giavischà da puspè far in brunch, sco els avevan gia fatg il 2012.

200 annunzias, ma i vegn spetgà anc inqual dapli

Mo sco Anita Alpiger ha ditg, na fissi betg pussaivel da far l’entira lavur senza numerus gidanters. Per dar da baiver e da mangiar als osps ch'èn s’annunziads dovri 22 persunas.

Fin ussa èn s'annunziadas 200 persunas. Ils Alpigers quintan però ch'i vegn anc bain inqual senza s'annunziar. Ils emprims osps vegnan spetgads la damaun enturn las 9:00.

Laschar ir video «Ina visita ad in ensolver dal 1. d'avust ad Alvagni»

Ina visita ad in ensolver dal 1. d'avust ad Alvagni

1:29 min, sil punct dals 1.8.2017

Prim d'avust sin bains purils en Svizra

Per la 25avla giada han blers bains purils envidà a l'ensolver tradiziunal dal prim d’avust. Sin passa 350 bains purils han radund 150'000 giasts cumenzà il di da festa. Quai communitgescha l’Uniun purila svizra. Tranter ils giasts eran quest onn er ils cussegliers federals Ueli Maurer e Johann Schneider-Ammann ed ils sportists Matthias Sempach e Stéphane Chapuisat.

RR actualitad 08:00