Siglir tar il cuntegn
Inhalt

Surselva 144: La PCD Surselva fa renfatschas al chantun

Tenor la PCD na saja quai a Cuira era betg pli simpel da chattar persunal per la centrala dal 144 che a Glion.

Kevin Brunold
Legenda: Kevin Brunold, il president da la PCD Surselva na parta betg l'opiniun dal chantun. RTR

La PCD Surselva fa reproschas al departament da sanadad che vul metter la centrala dal clom d’agid 144 da Glion a Cuira. Las reproscha ch'èn ussa sin maisa en cleras: Il chantun vul far responsabels la Surselva ch’i n’haja betg persunal avunda tar il 144. La raschun saja che nagin veglia vegnir en Surselva a lavurar pretenda il chantun. Uschè nunattractiv na saja la Surselva betg, manegia la PCD Surselva. Las plazza da lavur tar il clom d’agid 144 sajan in problem en l’entira Svizra e betg mo en Surselva, fa la PCD Surselva valair.

Sch’ins pren ussa naven quellas plazzas da Glion, lu ei quei aunc ditg buca detg ch’ins survegn emploiai che fan quei a Cuera. Quei ei in ualti lev argument dil cantun per sligiar si il 144 a Glion.
Autur: Kevin Brunoldpresident PCD Surselva

Il president da la PCD Surselva Kevin Brunold manegia che la mancanza d’attractivitad da la Surselva sco il chantun ha fatg valair, saja in falomber argument per dischlocar il clom d’agid davent da Glion.

Cumpensar las plazzas che van a perder

Plinavant pretenda la PCD ch’il departament repondereschia questa decisiun da centralisar il 144 a Cuira ed uschia stritgar 9 plazzas da lavur en Surselva. Sche quai fiss la finala la suletta soluziun pretenda la PCD Surselva che las plazzas vegnian cumpensadas cun atras plazzas chantunalas per la Surselva.

Sco quai che Cristian Rathgeb ha scrit ad RTR, sajan quai reproschas e pretensiuns gravantas che la PCD Surselva fetschia. El vegni a prender posiziun tar quellas rinfatschas, dentant pir cura ch’el haja sclerì ils fatgs cun ils responsabels dal spital regiunal a Glion, cun l’uffizi da sanadad e cun la cumissiun da salvament.

RR actualitad 17:00