Siglir tar il cuntegn
Inhalt

Surselva 120 policists a Breil

Actualmain è la Scola da polizia da la Svizra Orientala a Breil e conturn per in curs pratic. In lieu ideal per far la scolaziun uschia che quai pudess era capitar l’auter onn.

Legende: Video Eba betg sco en ils films! abspielen. Laufzeit 03:44 Minuten.
Or da Battaporta dals 21.04.2017.

Duas emnas èn var 90 aspirants ed aspirantas a Breil per metter la teoria emprendida ils ultims 7 mais en la pratica. Accumpagnads vegnan els da 30 instructurs e gidanters. Che quels èn gist a Breil ha da far cun l’armada. Sco il manader da la scola Patrick Bacher di, è l’infrastructura da militar ideala per manar tras ils curs. Ma els stoppian mintgamai guardar nua che quella infrastructura è libra. Questa giada saja quella a Breil stada libra. Tenor el in lieu fitg adattà per lur basegns.

Vischnanca profitescha

Tenor Bacher èsi era impurtant che l’economia regiunala profiteschia da quest curs. Uschia cuschina ina ustaria per ils participants dal curs. Che la vischnanca profitescha conceda era il president communal da Breil, Clau Schlosser. Betg mo l’economia profiteschia. Ils aspirants da policist emprendian d’enconuscher la regiun e quai saja reclama. Perquai beneventass la vischnanca da Breil era sch’il curs fiss ils proxims onns a Breil. Quai correspunda era al giavisch da la Scola da polizia da la Svizra Orientala. Sco Bacher di fissi quai d’avantatg da pudair far plirs onns il curs en il medem lieu. Ma quai dependia da l’armada e da l’occupaziun da l’infrastructura.

Populaziun duai betg vegnir disturbada

Per che la populaziun na peglia betg tema cura ch’ella vesia tants policists è vegnì infurmà ordavant via il Fegl uffizial Surselva. La populaziun na duai dentant betg vegnir disturbada. Sco Bacher di na saja quella era betg integrada en lur exercizis. Per quai hajan els agen persunal.

RR Telesguard 17:40