Las quatter persunas che lavuran en il center per requirents d’asil a Mustér Bellavista èn fitg savens fatschentadas cun chaussas administrativas e na han pervia da quai betg adina temp per approfundar las relaziuns cun ils requirents. Quai ha detg la manadra dal center Marianne Röthlisberger.
Las plaivs porschan maun
Quai è il punct da partenza per l’idea da Roland Just, il plevon refurmà da la Cadi. Ensemen cun la plaiv catolica ha el envidà a la saira d’infurmaziun e gest preschentà plirs project co s’avischinar als requirents d’asil.
I va per activitads pussaivlas sco curs da cuschinar communabels, emprender tudestg – quai che è la premissa la pli impurtanta per ils requirents d'asil per insumma pudair communitgar cun ils indigens – però er in project dal center d’agricultura: il Kulturkino. Quellas activitads èn vegnidas preschentadas a la saira d'infurmaziun. Tgi che leva ha pudì s'inscriver en ina glista ed inditgar co el ni ella fiss pront da gidar, ed uschia promover ils contacts tranter indigens e requirents d’asil.