Siglir tar il cuntegn
cuntegn

Surselva 10 onns communicaziun.ch

Avant 10 onns è l'interpresa da marketing vegnida fundada cun la finamira da daventar il numer 1 sin la fiera da marketing en Surselva. En quels 10 onns è il dumber da persunal creschì da 2 sin 51 persunas.

Ils 1 da matg 2008 ha Armin Spescha fundà ensemen cun in partenari l'interpresa da marketing communicaziun.ch. La finamira: daventar il numer 1 sin la fiera da marketing en Surselva. Ina finamira, che Armin Spescha ha gia daditg cuntanschì. En quels 10 onns è il dumber da persunal creschì da 2 sin 51 persunas, e be pli 1/4 dals clients da communicaziun.ch vegn da la Surselva.

Digitalisaziun è impurtanta, ma...

Gia spert suenter avair cumenzà cun ina partiziun da marketing, ina partiziun da grafica ed ina stamparia, è la paletta da las lavurs vegnida schlargiada sin il sectur digital. Senza la digitalisaziun e la pussaivladad da tgirar clients en l'entira Svizra davent da Glion na fiss i tenor Armin Spescha betg stà pussibel da crescher uschè fitg ils davos onns.

Dentant, era sche la communicaziun digitala è vegnida adina pli impurtanta, la stamparia na vegnia betg a svanir. Tenor Armin Spescha fan adina dapli interpresas puspè reclama stampada – tant interpresas indigenas sco er grondas interpresas internaziunalas.

Nov num e logo per mussar svilup

Il nov num – communicaziun.ch survegn anc il supplement «la manufactura» – ed il nov logo duain mussar tenor Armin Spescha il svilup che l'interpresa ha fatg ils davos 10 onns. Els fetschian dapli lavurs, l'interpresa haja bler dapli persunal ed i dettia autras fatschas davos communicaziun.ch. Tut quai haja pretendì ina midada dal num e dal logo, di Armin Spescha.

Ina chaussa vegnia dentant betg a sa midar: Glion vegnia vinavant a restar il lieu da la sedia principala da communicaziun.ch. I na dettia betg motivs da midar quai en l'avegnir.

RR actualitad 17:40