Siglir tar il cuntegn

Surselva 1,8 milliuns per restaurar la baselgia da la claustra da Mustér

La Confederaziun sustegn la restauraziun da las fatschadas en il sid e l’ost ed en l’intern da la baselgia. En in'emprima transcha dettia la Confederaziun ca. 700’000 francs – quai per las lavurs vid la fatschada en il sid.

Isabelle Chassot e l'avat Vigeli
Legenda: Isabelle Chassot e l'avat Vigeli RTR, H. Giger

Quai ha la scheffa da l’Uffizi federal da cultura, Isabelle Chassot, ditg venderdi ad RTR, cura ch’ella ha visità la claustra. Ella saja engraziaivla a la cuminanza dals benedictins, co els prendian a mauns las lavurs cun quità e surtut er cun tge optimissem ch’els na temian betg las novas incumbensas.

11,5 milliuns francs èn rimnads

Era l’avat Vigeli è leds che la Confederaziun sustegn las lavurs suenter che la claustra aveva stuì spustar la renovaziun pervi dad in moratori federal.
Els hajan ensemen ca. 11,5 milliuns francs per la renovaziun da la baselgia. Mo ils ultims 3,5 milliuns sajan ils pli stentus da rimnar.

Retard

Il mument en ils lavurers vid la fatschada en il sid. Sco l’avat ha ditg sajan els in zichel en retard pervia da la trid’aura. Mo els sperian da pudair finir fin october/november questa part. L’auter onn vul ins prender a mauns la fatschada en l’ost e suenter alura l’intern da la baselgia claustrala a Mustér.

RR Actualitad mezdi