Siglir tar il cuntegn
Inhalt

Surselva 1'500 viadis per transportar 3'000 tonnas betun giu dal Scopi

Sisum il piz Scopi (3200 m) en Val Medel ha l’armada svizra in sistem da survegliar il traffic. E là aveva ella era construì in camuflagi cun betun. Ma ussa ha l’armada decidì da dismetter quest camuflagi.

Questa lavur fan ils emploiads da l’armada svizra ensemen cun las firmas da construcziun. Tut il material dal camuflagi – 3000 tonnas betun - stò vegnir manizzà e transportà a val. Sco il responsabel da questa lavur Clemens Berther ha ditg ad RTR, possian els transportar mintgamai en dus containers ca. 2,4 tonnas dal Scopi fin Stgegia (1900 m). Quai dat quasi 1500 viadis. Da Stgegia transpareschan camiuns vinavant il material fin sin la deponia a Sedrun, e là vegn quel reciclà.

Lavur intensiva

I saja ina lavur intensiva cun quest transport, di Clemens Berther. Ma sche tut va sco previs, e l’aura sin il Scopi na fa betg in stritg tras il quint, quintian els da finir questa lavur fin il 2018.

Dormitori nov

En il lieu dal camuflagi vegn construì in dormitori inclusiv localitads da mangiar per l’armada svizra e per ils 16 emploiads sin il Scopi. Il dormitori vegl en il culm cuntrafetschia a las prescripziuns da fieu. Perquai sto il dormitori nov vegnir construì en il liber. El ha plaz per 50 persunas e custa 8,5 milliuns francs.

RR actualitad mezdi 11:00