Siglir tar il cuntegn

Header

Navigaziun

Chommas d'ina dunna.
Legenda: Damas d'escort. Keystone
cuntegn

Grischun Sex al WEF – ina dama d’escort raquinta

Durant il WEF sa noda la branscha d'escort èn ils raps ed i vegn fatg la fatschenta da l'onn: Tut mo in mitos, di la dama d'escort Romina. Uschia spectacular na saja quai gnanc.

Romina è il num d'artista da la dama che vegn da la regiun da Turitg - là nua ch'ella lavura normalmain. Quest'emna però inscuntr'ins ella per il pli a Tavau al WEF. I saja bain uschia ch’ins haja dapli da far, ma discurrer dad in «boom da clients» na possian ins betg, di la dama da 47 onns che porscha sin giavisch in service cumplet tranter auter era cun diversas shows.

Romina
Legenda: Romina lavura dali prest 4 onns en la branscha d'escort. Surprise Escort

Ins na possia betg dir ordavant sch'i dettia bler u plitost pauc da far. La branscha funcziunia tenor il factur da desideri. A bunura na sappia in um betg sch'el haja veglia la saira. Ils umens dal WEF hajan blers termins e veglian simplamain in pau recreaziun cun ses servetschs.

Sche mes client è in cassier u in VIP è en sasez tuttina. Tar mai survegnan tuts il medem bun service.
Autur: RominaDama d'escort

Romina di cun in rir: «Las dunnas che din da quai, quellas siemian u ch'ellas emprovan tras quai da survegnir ina plivalur. Quai na grategia però quasi mai. Plitost il cuntrari è il cas. Ins na vegn betg pli prendì serius.» Romina manegia vinavant, che quai na correspundia insumma betg a la realitad. Impurtant saja ch'il service saja bun – punctualitad, seriusitad ed anonimitad saja il pli impurtant.

Che dunnas vegnan sguladas al WEF aposta per servir als umens, da quai ha era Romina gia udì. Dentant, sche quai è propi uschia u betg, na po ella respunder. Tge che na saja dentant insumma betg in mitus saja il fatg ch'ils umens empostian las dunnas. Dunnas ch'empostian umens dettia dentant darar.

Service aposta per giasts dal WEF

Ina u l’autra firma d’escort porscha in service spezial durant il WEF a Tavau. Sin la pagina d’internet d'ina firma d’escort da «high class» pon ins per exempel leger ch'ins saja sa spezialisà sin clients da la politica e da l’economia e ch'ins procuria ch'il di dals giasts daventia pli dultsch.

RR actualitad 12:00