La polizia chantunala grischuna avertescha danovamain da cugliunaders da tric. Ella supplitgescha la populaziun d'esser attenta. Sco quai ch'ella communitgescha, saja vegnida annunziada l'emna passada ina nova furma da cugliunaria.
Ina persuna saja sa dada per in policist ed haja telefonà ad ina dunna da 75 onns cun simular il numer da telefon da la polizia chantunala dal Grischun. L'um che discurriva tudestg da scrittira haja declerà a la seniora, ch'i dettia en l'entira Svizra in'acziun cunter cugliunaders da tric da biadi. Ella duai perquai deponer ses daners en salv tar la polizia. La dunna è uschia vegnida cugliunada per 45'000 francs.
La polizia chantunala recumonda:
- esser sceptics tar cloms da telefon da policists che discurran tudestg da scrittira
- telefonar enavos a quel ch’ha telefonà
- sa laschar cun il numer d’urgenza 117 cun quest policist ch’ha telefonà
- en cas da dubi alarmar la polizia
- dir nagut davart la famiglia e cons daners ch’ins ha
- mai surdar daners u objects da valur a persunas estras
- fixar cun la banca limitas da prender giu daners
- annunziar a la polizia sch’ins è vegnì cugliunà
RR novitads 17:00