Siglir tar il cuntegn
Inhalt

Grischun Segunda emprova: Caluori pretenda curs d'igiena per ustiers

Dapi bunamain 20 onns na datti betg pli la patenta d'ustiers. Dapi lu sa mintgina e mintgin avrir in'ustaria. Il president da Gastro Grischun Franz Sepp Caluori vul midar quai.

purtret Franz Sepp Caluori
Legenda: Il president da Gastro Grischun cumbatta danovamain per reglas pli severas en la gastronomia. RTR

Franz Sepp Caluori, il president da Gastro Grischun, giavischa, che persunas che n'han ni experientscha ni ina scolaziun en la gastronomia, stoppian absolver in curs da tschintg enfin diesch dis. Quai surtut per emprender la savida da basa pertutgant l'igiena e la vivonda.

Segunda emprova – questa giada per «patenta light»

Gia avant dus onns aveva inoltrà il deputà da la PCD in'incumbensa en il Cussegl grond. Lura anc cun reglas pli rigurusas. Quella giada senza success: Tant il parlament sco er la regenza avevan refusà la dumonda. Perquai emprova Caluori uss cun ina versiun main severa. Il Cussegl grond tracta l'incumbensa l'enviern che vegn.

Patenta d'ustiers dapi il 1998 betg pli necessaria

Dapi il 1998 n'è la patenta d'ustiers numnadamain betg pli necessaria en il Grischun. Avant stueva in ustier far la patenta d’ustiers che cuzzava 14 emnas avant ch’el survegniva la lubientscha d’avrir in manaschi gastronomic.

RR actualitad 07:10