Siglir tar il cuntegn
Inhalt

Grischun Sche pleds-clav vegnan en ils fauss mauns

Mintgatant dovri mo in dus clics e voilà: in lader da datas po s'annunziar sin tes contos da mail u facebook. Quai na sto betg, ma po senz'auter avair consequenzas, tant per il delinquent sco era per la persuna pertutgada.

Legende: Video Sche pleds-clav vegnan en fauss mauns abspielen. Laufzeit 04:04 Minuten.
Or da Telesguard dals 21.03.2018.

Bleras persunas partan bleras infurmaziuns en la rait u dovran pleds-clav a moda malprecauta. Quai è privlus e carmala criminals. Insatgi pudess malduvrar datas persunalas, trametter mails en l'agen num u disfamar l'agen num.

Sa proteger è l'A ed O

Il suandant è da resguardar per sa proteger en l'internet:

Pleds-clav:

  • lunghezza minimala dad 8 segns cun bustabs, cifras e segns spezials
  • mai notar pleds clav insanua: perquai tscherner in pled-clav ch'è simpel da tegnair endament, il meglier frasas entiras
  • differents pleds-clav per mintga account
  • midar il pled-clav da temp en temp

E-mail:

  • attenziun tar e-mails da spediturs dubius u nunenconuschents
  • betg avrir documents cun duas finiziuns (p.ex. picture.bmp.vbs).
  • betg dar l'adressa dad e-mail a bleras persunas
  • betg respunder ad e-mails da spam
  • adina sortir dal facebook u account da mail sco ch'i s'auda

E sch'igl è memia tard?

Sch'insatgi ha fufragnà en ils accounts persunals u schizunt surpiglià la controlla da quels, èsi impurtant da reagir svelt e far in'annunzia al post da polizia ch'è il pli da manaivel. Perquai èsi d'avantatg dad avair uschè bleras infurmaziuns sco pussibel, per exempel cura exact che l'attatga e capitada e forsa schizunt da tge adressa dad IP che l'attatga e vegnida.

MELANI

www.melani.admin.ch, il link avra en ina nova fanestra è ina pagina d'internet per annunziar cas da criminalitad en l'internet. La pagina analisescha, tge privels ch'èn en il mument mintgamai actuals e fa attent sin las strategias da criminals en l'internet. Sin la pagina chattan ins era tips per sa proteger encunter attatgas da hacking.

TR Telesguard 17:40