Siglir tar il cuntegn

Grischun Rock & Pop “sco'ls gronds” – scolas da musica in concert

A Scuol s’han inscuntradas 7 gruppas da scolas da musica per sunar rock e pop en rom professiunal – vul dir: cun infrastructura professiunala davant public e giuria. Envidà ha la Scola da musica Engiadina Bassa/Val Müstair in occasiun da ses 40avel anniversari, scriva l’agentura da novitads ANR.

La band sin la tribuna.
Legenda: „Hard Milk“ da la Surselva - ha sunà trais atgnas cumposiziuns in lingua rumantscha. ANR
La gruppa Green Shoes sin tribuna.
Legenda: "Green Shoes" da Bruneck (I) - ils favorits dal public a Scuol. ANR

L’offerta da concertar è ida a gruppas da maximalmain 10 persunas en l’etad tranter 10 fin 21 onns.

Els ston far part a scolas da musica e vegnir accumpagnads dad ina persuna responsabla.

Exercitar, concertar e vegnir giuditgà

L’andament era per tuts il medem:

Suenter ina curta prova èn las gruppas sa preschentadas cun in concert da radund 25 minutas per survegnir gist suenter il giudicat da la giuria.

Da la partida eran sper 5 gruppas grischunas er ina da l’Austria ed ina da l’Italia.

Quest eveniment è surtut impurtant per che las gruppas sa possian preschentar ad in public vast ed ad ina giuria, che valitescha lur prestaziuns.
Autur: Roberto Donchimanader Scola da musica EB/VM
La gruppa reat sin tribuna.
Legenda: "REAT" da l’Engiadina Bassa - ha sunà hardrock. ANR

Ils victurs dastgan sunar a la festa da Cuira

Per la giuria eran la gruppas «Hard Milk» da la Surselva cun trais atgnas cumposiziuns in lingua rumantscha e la gruppa «REAT» da l’Engiadina Bassa cun hardrock las meglras.

Il public ha votà cun applaus per la gruppa tagliana «Green Shoes» da Bruneck, rapportescha l'ANR.

Quest onn era il 5avel inscunter da quel gener en Grischun.