Siglir tar il cuntegn

Header

cuntegn

Grischun Regenza vul midar anc ina giada la lescha da scolas medias

L'onn 2020 ha il Grischun bunamain mo pli la mesadad dals giuvenils, pia er mo pli la mesadad da scolars da scolas medias. Ina revisiun totala da la lescha da scolas medias duai perquai reagar ad uras sin quella situaziun.

Ier è il programm da la regenza per ils onns 2017 enfin 2020 vegnì preschentà. In punct or dal programm fa in zic smarvegliar. La regenza vul anc ina giada far ina revisiun da la lescha da scolas medias, e quai malgrà che la lescha è gist vegnida revidida l'october 2014. Sco cusseglier guvernativ Martin Jäger di, saja il problem dentant quel ch' il Grischun haja memia paucs giuvenils, respectiv memia paucs scolars per scolas medias.

Plaz havessan las scolas medias per 2500 enfin 3000 scolars, l'onn 2020 dettia el Grischun dentant be pli 1500 scolars. Entant che las scolas primaras dal chantun hajan reagì sin la diminuziun da las naschientschas cun far consorzis, saja anc capità nagut tar las scolas medias.

audio
Bunura: Regenza vul midar lescha da scolas medias
ord Actualitad dals 15.12.2015.
laschar ir. Durada: 1 minuta 25 Secundas.

Regenza vul direger las pussaivladads en l'avegnir

Enfin uss possia il chantun be direger la scola chantunala a Cuira, di Martin Jäger. Las scolas medias privatas tutgan tar ina fiera libra. «Questa stad a Ftan avain nus vesì tge cha quai munta sch'il chantun na po direger nagut e sto be guardar tge che capita», di Jäger. Co il chantun vul lura pudair direger dapli, na sa Jäger anc betg dir. Cler è dentant ch'i vegnia a dar anc bleras discussiuns avant ch'igl è uschè lunsch.

Tar la davosa revisiun da la lescha da scolas medias l'october 2014 ha il chantun auzà ses sustegn finanzial per scolas medias privatas. Quai na tontschi a lunga vesta dentant betg per cumpensar las consequenzas da las paucas naschientschas.

Artitgels legids il pli savens