En la Cadi ha l’Uffizi da chatscha sajettà la notg sin ils 20 da schaner 2022 in luf. Durant emnas haja adina puspè dà inscunters preoccupants tranter il luf singul e persunas en territoris d’abitadi. Quests inscunters sajan vegnids qualifitgads sco cumportament problematic cun ina periclitaziun potenziala da l'uman, uschia l’uffizi. Il chantun haja perquai decis da sajettar l’animal. Quai sin basa da la clausula generala da la polizia.
Encletga per agir
Anita Mazzetta dal WWF Grischun e Sara Wehrli da Pro Natura Svizra han encletga per l'agir dal chantun. I na possia dentant betg vegnir la regla che trieps da lufs vegnan regulads cun sa basar sin la clausula da polizia. Anita Mazzetta conferma, ch'els sajan adina stà infurmà da l'uffizi dals proxim pass ed en il cas da quest luf saja er stà cler da sajettar il luf problematic.
Uniun purila beneventa agir
Thomas Roffler, il president da l'uniun purila chantunala beneventa l'agir dal chantun da sajettar il luf problematic sin basa da la clausula generala da polizia. En futur saja dentant er d'agir tenor saun giudizi sche lufs vegnan massa damanaivel da las vischnancas e bain purils.
Uffizi federal d'ambient spetga ulteriuras infurmaziuns
Il chantun haja permanentamain infurmà l'Uffizi federal d'ambient davart ses agir. Quai scriva l'uffizi sin dumonda dad RTR. El spetga dentant sin ulteriuras infurmaziuns dal chantun. Sin fundament da questas infurmaziuns vegn l'uffizi er a sclerir l'applicaziun dal Grischun da la clausula generala da polizia.