Uschia creschan las premias en il Grischun pli fitg ch’en Svizra, nua che l’augment è en media tar 6.6%. Per Grischunas e Grischuns creschids munta quai per l’onn 2023 en media ina premia da 340 francs al mais. Betg pertutgadas da l’auzament èn sut il stritg quellas persunas che retschaivan gia reducziuns da las premias. Cunquai che questas reducziuns vegnan calculadas sin basa da la premia actuala, s’augmentan era las reducziuns.
Sch’i na dat tar questas persunas naginas midadas tar las entradas u la facultad, lura vegn l’augment da la premia cumpensà tras il sistem da reducziuns da premias.
Il Grischun fa bler per gulivar l’auzament
Tenor Hans Peter Risch da l'Uffizi da sanadad dal Grischun haja il chantun in bun sistem per gulivar l’auzament da premias e per sustegnair las persunas cun entradas pli bassas. Quest sistem sustegnia bleras persunas en il chantun. Tenor in monitoring da las premias ed il sustegn finanzial dals chantuns che l’Uffizi federal per sanadad ha publitgà quest onn, constat quai. Tenor quel s’audan las premias che Grischunas e Grischun pajan sut il stritg tar las pli bassas en Svizra ed il chantun paja in’auta summa da reducziuns da premias, cumpareglià cun ils auters chantuns.
Cun las premias da las cassas da malsauns che creschan, pudessan er ils custs per las reducziuns da las premias crescher. Per ils chantuns munta quai ch’els ston budgetar dapli daners – perquai ch’els pajan ina part da las reducziuns da las premias. Il chantun Basilea-Citad vul per exempel augmentar las reducziuns da las premias uschè fitg sco las premias creschian – ha ditg il cusseglier guvernativ Kaspar Suter. Sumegliant tuni dal chantun Turitg. En divers chantuns ed en il Parlament federal pretenda la sanestra dapli daners per las reducziuns da las premias. Quellas creschan l’auter onn en media per bunamain 7 pertschient.
