La regenza dal chantun Grischun è cuntenta cun las mesiras da la confederaziun. Tar il homeoffice fiss la regenza dentant ida in pass pli lunsch ed avess introducì l'obligatori, di il manader dal Departament da sanadad dal Grischun, Peter Peyer.
Naginas mesiras supplementaras
La regenza vegnia a discussiunar sch'i dovria in obligatori da homeoffice u betg. Autras mesiras supplementaras n'ha la regenza betg previs enfin uss, di Peyer. Vinavant fetschia il Grischun schon bler dapli ch'auters chantuns. Quai cun l'obligatori da mascrinas en scola che vala en singulas regiuns e la strategia da testar.
Nus sperain ch'ils auters chantuns entschaivan era a testar en scolas.
Las libertads ch'ils chantuns han survegnì, muntan era bia responsabladad ch'ins stoppia prender serius, di Peyer.
Negina glista da quarantina
Plaschair fetschia ch'i na dat nagina glista da quarantina pli. Persunas che lessan entrar en Svizra ston persuenter far in test da PCR. Quella midada saja impurtonta per il Grischun, sch'ins mera ord vista turistica e da la gastronomia, di il cusseglier guvernativ.
Uschia san persunas, per exempel dal Portugal, vegnir senza quarantina a lavurar en il Grischun. Ed els duvrain nus durant la stagiun d'enviern.