L'onn 2019 scadan las reglas per ils tschains d'aua en Svizra. Quai fa surtut quitads a las vischnancas. Duas terzas da las vischnancas grischunas dependan dals tschains d'aua.
I saja ussa d'unir las forzas e da preschentar ina proposta ord vista da las regiuns da muntogna, ha Not Carl, il president da la «Cuminanza d'interess da las vischnancas da concessiun dal Grischun» accentuà glindesdi a la radunanza generala a Cuira.
Il temp nua ch'ils tschains d'aua culan automaticamain è passé.
S'unir e preschentar ina proposta
Davos las culissas giran il mument las tractativas tranter chantuns e la branscha d'electricitad. Tenor Fadri Ramming, secretari general da la Conferenza dals chantuns da muntogna, sajan quai tractativas difficilas.
I saja grev da prevair co la fiera d'energia sa sviluppeschia. Ma las vischnancas na possian en l'avegnir betg pli quintar ch'ils tschains d'aua sajan in'entrada fixa per la cassa communala.
Ina proposta co reglar ils tschains d'aua a partir da l'onn 2020 ord vista dals chantuns da muntogna duai esser sin maisa anc quest onn. Il cussegl federal pudess lura elavurar quella ed il parlament federal debattar la fatschenta il 2018.