Il svilup dals pretschs d'energia n'occupan betg be persunas privatas, ma er ils hoteliers e las hotelieras en il Grischun. Il nov labor da la Corporaziun per hotellaria grischuna ha fatg l'avust ina retschertga cun 112 manaschis. 46 retiran l'electricitad sin il martgà liber. Mintga terz da quels quinta cun in duplicaziun dals custs per electricitad ed in quart sto probablamain pajar almain trais giadas dapli per la forza electrica.
30% dals manaschis dumandads, teman problems existenzials tras ils pretschs d'energia.
Betg simpel da chattar soluziuns
Sin la dumonda tge ch'ils manaschis ch'han anc betg fatg contracts, vegnan a far encunter ha passa in terz ditg ch'els n'hajan nagina idea tge far e ch'els tschertgian soluziuns. 58% han inditgà ch'els speran ch'ils pretschs sa reguleschian puspè e spetgan perquai cun tschertgar ina soluziun.
Pretschs d'electricitad n'èn betg l'unic quità
Sper ils pretschs d'energia auts mussa la retschertga ch'ina gronda part dals hotels en Grischun (78%) han problems da chattar spezialistas e spezialists e 65% as fan pensaments davart la durabilitad da lur interpresas. Auters temas che dattan da pensar als hotels èn tranter auter la digitalisaziun, la finanziaziun d'investiziuns e la planisaziun da successiun.
