Per il di mundial da persunas cun impediment fa la Pro Infirmis gia dapi il 2019 l'acziun «Da la medema pasta». Cun quella acziun vegnan fatgs e vendids pops da pasta. I n'èn dentant betg pops da pasta usitads, mabain tals cun in impediment vesaivel sco mo 1 chomma u cun ina sutga cun rodas.
Cun l'acziun duai ins mussar che tut ils umans èn fatgs cun la medema pasta, pia tut ils umans èn eguals. In'egualitad na dettia dentant anc ditg betg. Per persunas cun impediments dettia en il mintgadi bleras barrieras. Saja quai en il spazi public, sin il martgà da lavur u en la politica. E la Pro Infirmis veglia reducir quellas barrieras, di Katrin Thuli-Gartmann, la manadra da Pro Infirmis Grischun.
I va persuenter che las barrieras vegnan reducidas, er en ils cors ed en ils chaus e ch'i vegn fatg attent che l'access n'è anc betg dal tuttafatg egual
L'acziun è vegnida lantschada l'onn 2019 en il chantun Glaruna. Ussa vegn ella realisada en quasi tut ils chantuns. In Svizra han 20% dals umans in impediment. Quai pon esser impediments corporals, psichics u cognitivs. Ins stoppia esser conscient ch'ins na possia betg adina vesair impediments, di Katrin Thuli-Gartmann.
Ils pertutgads fan part da l'acziun e vendan ils pops da pasta. Per la manadra da Pro Infirmis saja quai stà fitg bel tar l'ultima acziun sco che las persunas pertutgadas èn sa mussadas e cun tge plaschair ch'ellas han vendì lur pops da pasta.
A moda e maniera simpatica vul la Pro Infirmis effectuar insatge positiv e far in pass en direcziun societad pli inclusiva. Per cuntanscher questa finamira dovri dentant dapli. I saja in lung process da passa blers onns. E per daventar propi ina societad inclusiva stoppia mintgin e mintgina far insatge persuenter e betg mo organisaziuns sco Pro Infirmis.